星期日, 10月 10, 2010

劉曉波獲獎解讀:挪威怕了溫總

葉一知


繼奧運、世博等榮譽後,強國再下一城,勇奪本年諾貝爾獎,雖然是和平獎,與其他科學獎文學獎還未結緣,但咁係一個很好的象徵,因為只有本屆和平獎得主爭取的東西成功落實,才有可能獲得其他諾獎,特別是文學獎。

至今,劉曉波成為第一個中國人得此獎(不計「中國籍」的藏人達賴),實在非常值得所有中國人慶賀。

 

可惜,強國反應麻麻,還發表強硬措辭,指劉曉波在中國係罪犯,頒獎給他有違諾獎精神和原則。咁又唔係喎,孟德拉係監犯,昂山素姬都係監犯,依家仲俾人軟禁緊,達賴係流亡人士,返中國都係俾人拉硬。咁就表明,諾獎是次冇違反一向的原則,反而因為認同強國的國際地位,不再歧視中國人,實在值得全國放煙花慶祝。
 
強國又指,咁樣做會影響中挪關係。可是,我哋強國係最討厭人「干預別國內政」,挪威頒獎俾邊個,都係別國內政,嚴格來說,更係全球的「球政」,得獎者遍佈全球各地。孔子話「己所不欲,勿施於人」,何解堂堂中華文化領導者,將自己討厭的施於人家,這很不該啊。另外,中國常說「國情不同」,言論自由在外國是香花,來到中國被定性為毒草,我們怎可以用毒草之心欺壓人家的香花?

何況,是次挪威頒獎給劉曉波,絕對唔係唔俾面中國,反而係俾足面子我哋溫家寶總理,怕了我哋強國。就早幾日之嘛,溫總接受CNN訪問,佢話:「我認為言論自由對任何國家都是不可或缺的,不論是邁向開發的國家,或是已經壯大的國家。人民對民主的渴望也無可抗拒。」劉曉波起草「零八憲章」,追求的就是民主和語論自由。好明顯,挪威聽到溫總咁支持民主同言論自由,嚇到腳軟,急急大拍馬屁,就頒個獎俾劉曉波囉。

所以,身為中國人,係應該感到高興啊。當然,呢個世界唔係個個都咁理性,強國官方就表明「影響跟挪威的關係」。似乎反挪運動即將發生。等我獻條好橋:日本名作家村上春樹有本名作叫《挪威的森林》,仲拍成咗電影,應該好快有得睇,咁近排中國因釣魚島要反日,又因和平獎要反挪,咁不如鼓動憤青出來,焚燒《挪威的森林》,禁播其電影,咁就同時反挪又反日,大顯強國效率啊。

文章由MemDB聯播系統轉載, 原文請按此閱讀