唔包又包
葉一知
政府前天先言之鑿鑿，話明唔派包機，轉個頭，都唔知有冇廿四小時，又話包。包二奶有冇咁兒戲？昨天唔包今日就話包？真係幾搞笑。
據保安局長李少光頭先話，因為泰國局勢轉壞，所以決定要派包機喎。我係咪冇睇新聞？定係香港學咗大陸，將不適當嘅新聞刪咗去，改播廣告？點解我唔知昨天到今天，泰國嘅形勢突然變壞得咁厲害？
港府成日話，航空公司有責任保香港人番嚟。啱，但係而家咩形勢？將心比心，你身在異地，求助無門，但係你嘅政府唔理你喎，你點諗？去到呢啲緊張形勢，咩都係廢話，將啲香港人安全送番嚟，先係至理，呢啲唔係民粹，而係一個政府應負嘅責任，去咗外地嘅香港人，仍然係香港人，香港政府唔幫，唔通希望美國政府幫？何況仲有啲旅客唔係搭國泰，有機上添！