(報道)中女話題 殺入書展
感謝蘋果推介中女起錨.
另一本都幾搞鬼咁喎.
消費 blog：中女話題 殺入書展
2010年07月20日
灣仔書展聽日開鑼，今年都有唔少另類書出場，其中非傳媒出版社出咗本《港女聖經 II中女起錨》，聽個書名好似幾積極噃。作者葉一知噚日同小妹講，香港家流行「中女」一詞，係指年過 30歲未婚嘅女性，日本叫做「敗犬」，大陸叫「剩女」。
教中女變 LV
葉一知話，呢啲三高（高齡、高薪、高學歷）嘅中女，存在一啲錯誤觀念，輕則放棄男人，重則痛恨男人。寫呢本書希望將中女嘅諗法撥亂反正，從此起錨達至 LV目標。 LV係指 Ladies of Vintage。 Vintage係葡萄酒嘅釀製年份，引伸為美酒，給有品味嘅人採摘同欣賞，「呢本書係教中女點樣成為 LV，找到真愛」。另一新書《專治政無能之起你個錨》，以嬉笑怒罵剖析現今政譠「政無能」。
講到中女，快樂書房出咗本《中女挑宅男》，由節目主持人彭晴等四名作家，以幽默抵死寫成一段四合一愛情故事，代中女宅男盡訴心中情。
上書局/小書局出版社嘅《大廣東 2》，衝住內地政協提出喺大眾媒介取締廣州話而嚟，總編輯 Carmen話新書延續廣東文化，介紹香港嘅色情文化、搞笑傳統等；《維城通志》則以諷刺手法記錄本港官商勾結、貧富懸殊嘅現象，「我哋仲出埋 100套連麻雀嘅限量套裝，將麻雀嘅東南西北，改為官商勾結； 8隻花改為河蟹等。」
香港自然探索學會以另類生態書籍搶攤，總幹事洪家耀話，好似《地質遊學放大鏡》圖文並茂列出 10條如蒲台島僧人石等地質路線；《香港有趣生物》寫足 19種會發光等特別生物；《香港幽山美地行賞》介紹 12條非一般行山徑。