好咩戲量，我?冇氣量喎
葉一知
本來真係唔想加把嘴講好戲量，你估我唔驚facebook又整個乜乜「將好戲量嘅契弟葉一知踢出mysinablog」嘅group呀(我唔係好戲量,亦都唔識佢,不過凡支持佢嘅就係佢契弟, 這樣寫是照顧某些人的思考模式)？一陣班黑衣人嚟留言，咁點算呀？
但係睇咗幾篇，越係忍唔住頸。其實好多人都講過，大家自己去睇多啲，我都唔詳細講，當中不乏學術論點或其他理論，呢啲我就唔講，講幾多有乜用，反對嘅人又會去睇吓書，靜心理解你講乜咩？
呢單嘢越撈越多嘢，有啲言論真係睇唔過眼。有人話，好戲量阻街。咁其實好簡單啫，首先，佢地係咪合法先？呢一點我唔得閒查，如果佢地係可以咁做嘅，咁做乜要踢走人啫？因為佢地阻住你行街街？有人更加話阻住人趕去百老匯睇戲。就好似遊行咁，申請批咗，咁就行㗎啦，係就係阻住咗某啲人搭的士或者行街街，但呢個係公民社會喎，人家有權遊行，你將來也可以申請遊行，互相阻吓。你唔用人哋用，你冇理由要將遊行踢出香港㗎？又等於你有權將捐款報稅，扣減稅項，你行使咗，人地大把錢，唔用呢個權利，佢可唔可以媽叉你吖？