中國大陸，好難捉摸
葉一知
近日私務甚忙，無暇詳細閱讀新聞。不過只聽近日幾單嘢，不期然覺得，大陸呢排好難捉摸。
首先，係自稱同一世界，同一夢想嘅奧運會，竟然唔俾《蘋果日報》記者入去採訪，變咗同一世界，唔同生果唔同命。唔係咁蠢係嘛？四川地震，生果記者都好似入咗去好多日喎，奧運呢啲國際盛事，擺明係俾你做公關攞分㗎啦，咁你覺得生果記者可以搞到啲乜？到時世界精英雲集，如果生果記者敢亂搞嘢，一定冇人可憐，必遭不少香港讀者唾棄。唔通你怕佢哋挖到啲乜勁料爆？佢哋真係有咁勁，咁唔通CNN、BBC之類嘅記者又係流嘢咩，有咩衰嘢俾國際傳媒捉到，生果一樣可以買通訊社新聞。而家做啲咁核突嘅嘢，抵人哋覺得當日國際城市搶你聖火係啱㗎喎！