民建聯又一成功爭取？
葉一知
報載，社交網站 facebook一個名為「我相信可以召集 100,000個厭惡民建聯的人！」的群組，組員人數即將衝破 10萬大關之際，突然被剷。設立群組的網民擔心，這是 facebook向惡勢力低頭的審查行動。網民誓不罷休，即日再開群組，戰鬥到底。
如果件事真係施壓被剷，真係聰明絕頂。有腦都知，一個有八萬幾會員，兼涉及情緒的群組，一旦被剷，情緒不會就此平伏，反是加劇反彈。好似細路仔果時，個男仔係咁話個女仔討厭，本來個女仔唔理佢，講得幾日，個男仔講到厭，除時仲由厭惡你變成有少少鍾意咗你，但你突然理佢，高調話唔俾佢再講，叫人按住佢個口，個男仔仲唔大發雷霆，講多十日？言詞自然更要激動百倍，除非你打到佢啞，或毒死佢，唔係你都好難叫佢收聲。
所以，今朝看報道時，這個復活版群組只有萬多會員，黃昏再看，已是29539，快將三萬，觀其勢頭，可能比之前更快突破十萬添。你話，開乜野群組，可以在一天之內，有二萬人加入？名垂千古難，遺臭萬年也不容易，民建聯多年努力，可能好快可以掛條banner出來：成功爭取一日乞幾萬人憎／成功爭取遺臭萬年。
這種簡單的細路仔玩泥沙邏輯，剷果個人(姑勿論係邊個)冇理由咁蠢唔明白嘅。適逢補選變相公投再即，仲去剷群組，觸動香港核心價值兩大支柱——言論自由和法治——之一，擺明係想幫手拉票。所以我大力支持剷群組行動，多剷多益。
Facebook群組連結(唔知剷咗未呢)-我相信可以召集１００，０００ 個厭惡民建聯的人！ [原來被刪，前admin 主理正式重生版] (愛護民建聯者勿進，內無蛇宴春茗等報名資料)