下世做狗都要知「訂」
葉一知
佛家有輪迴之說，今世的業報決定你下世人投胎做乜，一般人認為投胎做咗蓄牲就係造孽太多了。
但今時唔同往日，就算做貓做狗，也有天堂和地獄之分，好似做香港貓香港狗，做到某啲人嘅竉物，待遇就好過好多平民，即使做咗香港流浪貓流浪狗，都有愛護動物嘅人關注吓，都可以自己去搵食。但係如果你唔識投胎囉喎，去咗大陸，就算做咗百獸之王，唔單止唔風光，仲慘過做老鼠添。
早排遼寧瀋陽動物園就爆出老虎活活餓死嘅「醜」聞(加引號是要照顧鄰近地區不以之為醜的讀者)。因為動物園冇錢餵飽啲老虎，有十一隻東北虎就咁活活餓死，呢啲big cats真係慘過做流浪貓。不過佢哋唔係白白犧牲，佢地嘅肉身，肩負好神聖嘅任務，就係「投胎」成為虎骨酒，每遇重要客人來訪或逢年過節，動物園就囉啲酒出嚟送禮。
有啲人話，呢啲「醜」聞就濕濕碎啦，大陸餓死人都唔係咩大新聞。嘿，好戲還在後頭，亞洲動物基金會調查發現，包括港人熟悉的廣州番禺香江野生動物世界在內的多個著名動物園，動物生存情況令人震驚，不但冇保護動物，仲要啲動物近親交配、獅虎交配，繁殖畸形動物賺錢。
來生不做中國人？No，做中國人最多都係活活餓死、俾人活活打死或遭人活活逼害至死，但做中國動物呢？你就連動物都不如，非獅非虎，變成畸型的「合成獸」。
呢啲就係佛家講嘅「共業」，一個民族做嘅好事，我哋真係改變唔到，唯有個別修行，做番個正常人，或做傳說中有惻隱之心嘅中國古人，希望憑別業，下世投胎，做人做狗，都唔好去錯地方啦。