廢的走不了，走的廢不了
葉一知
志雲大師開記招，真係精彩：
陳志雲這一演出，恰到好處，風範無敵，一句「真的假不了，假的真不了」，必成城中潮語佳句，連講廢話都講得咁有台型，你話，唔俾十個叻佢點得。服晒！
呢一段三分幾鐘嘅片，應該俾特區政府各大大小小官員作教材傳閱，學下乜野叫做speech。speech唔係對住份稿講廢話——廢話已夠廢，攞十幾廿萬個月仲係識對稿讀又係廢，竟然要對住稿講廢話係廢上加廢。唔該，學吓陳志雲，寫廢話都要寫得咁玄妙，大家咪交稅都交得順氣啲囉。
看罷大師的精堪演出，終於知道點解當今特區政府人才凋零，因為好似陳志雲咁掂嘅人都唔會留喺政府，出哂外邊搵食。你話如果陳志雲一路做AO，平步青雲，再得到中央嘅祝福，可能會成為第三屆特首都唔定啊。
不過歷史又冇如果嘅。如果佢繼續做AO，會唔會最後進升為今日嘅人肉錄音機呢？
點都好，對的錯不了，錯的對不了，陳志雲給我們很對的啟發應該是：當今特區政府，廢的走不了，走的廢不了。