先不提政府做了什麼，同學又做了什麼
葉一知
特首曾蔭權就《施政報告》諮詢中學生，但學生不識時務，沒有即時歌頌煲呔的豐功偉績，竟敢就母語教學、殺校、環保等問題向其發問，惹得煲呔扯火收場。
其中最惹火嘅，係一位同學問特首在生活中有冇實踐環保，座駕用幾多cc，煲呔即時由和顏悅色，變成臉帶怒色，莫名其妙反駁：「同學一來到就攻擊曾蔭權，問你做了什麼，其他人都好鍾意問，這種態度好獨特……同學問我好多問題好針對性，問開什麼車、問我做了什麼。」(報道)
呢種九唔搭八嘅回答，學生就嚇死，有獨立思考嘅人只會笑死。點解問你座駕用幾多油，係一種攻擊？如果特首你話你平時多數踩單車嘅，會有掌聲，如果你用好多油，咁你唔夠環保，係fair comment，做乜無端端變咗攻擊？大佬，你主動嚟俾我問，我唔問你曾蔭權駕車，唔通問你表妹個仔個女朋友架車用幾多cc呀？咁都可以發嬲，即係身有屎，驚俾人咬實：自己講環保，但係用車就好唔環保。大佬，你係特首，咁多工作，用車慳番啲時間，大家唔會怪你，你也可以解釋，使唔使扯火呀？係咪用油多到沾咗啲上身，一撻就著呀？呢啲係政治家風範？呢啲只係中國式大家長不容小朋友質疑的劣根。