有李少光，陳巧文邊會有事架
葉一知
「千千萬萬」陳巧文俾人拉左，罪名係襲警。有人話陳巧文細細粒容易食，點樣襲警？咁又唔係咁講，你試下搵個豆丁兜頭淋支腐蝕性液體落個差佬到，睇吓係咪襲警？
所以要告襲警，就要講證據。嗱，警方當時係想制伏陳巧文，咁陳巧文反抗，有肢體碰撞，算唔算襲警先？唔喺現場就真係審死官，但幸好科技發達，警察又成日拍低啲示威者容貎，冇理由咁大嘅場面冇片睇架？
如果睇片作證，陳巧文就實冇事。因為當今嘅保安局長係邊個？係李少光，李少光近來有咩偉大言論？早幾日立法會保安事務委員會上，一眾官員同議員閉門睇咗多段官方同非官方嘅影片，睇吓上個月27日，係咪有公安越境執法無人理，點知李少光回答話：
「大家看同一段影片但有不同結論，警方看過所有影片的結論是暫時沒有證據顯示有內地執法人員跨境執法，剛才議員(指李卓人)說的我自己看不到。」
幾千年前趙高都教識你哋中國人架啦，望住一隻有四隻腳的動物，都可以有馬同鹿嘅不同結論，何況係睇影片呢？既然睇影片係可以有咁唔同嘅結論，咁如果警方攞段片出嚟話：「陳巧文果時顯然係襲警。」咁辯方就可以話：「大家看同一段影片但有不同結論，我們看過所有影片的結論是暫時沒有證據顯示陳巧文襲警，警方說的我自己看不到。」
所以有人擲通渠水，裝天眼都係冇用，因為就算影到，有李少光的「不同結論論」，辯方又可以說：「大家看同一段影片但有不同結論，我們看過所有影片的結論是暫時沒有證據顯示被告擲通渠水(可能只是變魔術)，警方說的我自己看不到。」
所以呢，有咁偉大的保安局長言論，陳巧文實無事嘅。八十後，唔使驚，繼續抗爭。