賣blog
葉一知
老老實實，呢排窮到燶，政黨有冇興趣買呢個沒落爛公園的特約時段？價錢相宜，豈止每星期四個鐘，直頭24/7，全天候廣播。
特約欄名我都諗咗一堆：
「十八傭人齊戇居」
「十八佞人唔認衰」(佞呢個字較深，讀「擰」——第六聲陽去聲唔係第二聲陰上聲「擰樣」,「擰茶」個「擰」呀下)
「十八聾人唔使催」(寓意班友聾嘅，聽唔到普選嘅民意架，唔使催啦)
「十八銅人使鬼推」(銅乃銅臭，「使」唔係「使唔使推」，係「有錢使得鬼推磨」的「使」)
「十八窮人難埋堆」
本公園特約服務的優點：
(1) 保證見唔到唔高興的留言，因為唔准留言。
(2) 保證冇爭議，也唔使浪費各大傳媒時間辯論，因為冇價值。
(3) 保證冇咩林彬情結。
(4) 絕對唔係與魔鬼交易，最多只係與屎忽鬼交易……hey老細唔好走住，我意思係你同我呢個屎忽鬼交易……
(5) 絕對唔驚俾人抽秤前言不對後語，當你要改變立場時，本園即永遠刪除過去持相反立場的文章，例如今日說了支持2017年有普選，過幾年要改說2037年才有，本園立即剷除所有支持2017有普選的文章，保證搵都搵唔番(cap圖？你改圖唔得架)。
(6) 保證服務期間唔會搞「我相信可以召集十萬討厭xxx的人」等活動。
(7) 以上條文可隨時由客戶釋法。
係咪抵玩呢？係就快啲嚟傾下啦。優惠期內，本園仲會請到著名嘅「少林寺十八銅人」前來表演助陣：
有興趣嘅政黨快啲嚟打救我啦……