煲呔果票投俾邊個？
<<
葉一知
這幾天太忙，想寫的，也沒時間寫，只怪自己分配時間不好。很多人分析了或寫了感想，我也無謂獻醜，只簡簡單單寫點心底話吧。
其實，我真係好驚葉劉淑儀會贏，我曾經跟人說過，如果葉劉竟然在港島區贏出，我對香港會非常失望，七一遊行帶來的香港自豪，也會失去。港島區選民一般有番咁上下教育水平，他們較易明白民主這種較高層次的價值，也理應較易明白是非，雖然我知道這其實無必然關係，但如果咁樣俾葉劉勝出，香港究竟變咗個乜嘢嘅社會？一個是非不分，只係用道德審判(如忽然民主、有政治野心、退休又復出冇誠信等)來思考？
幸好，葉劉輸了。但，也不值得太高興，因為佢握住十三萬票，與陳方安生只差三萬多票，兩者相差12%。如果(雖然政治沒有如果)民主派由其他人出戰，究竟有幾大機會贏到葉劉？從區選來看，真係輸九成。
連港島區也如此，民主派在明年立法會選舉必然陷於苦戰。慘就慘在，單叫民主派檢討改善，諗落都係冇乜用，因為沒有新人接力，資源又少，民主派唔打都會慢慢殘。冇新人，唔單止因為「大佬」霸住啲位，更因為香港已逐漸成為一個不利從政的地方。從政有咩長遠前景？有咩可以吸引到年青啲嘅人去從政？空有一腔熱誠就得？不如你話俾我聽。
因為比例代表制，葉劉明年極有可能入到立法會。不過，佢場仗唔會好似今日咁易打，因為今次係二人對決，中央可以下令親中派全力支持(不過民建聯和自由黨就互責大家唔落力)，但係到出年，唔通中央叫民建聯同自由黨唔好支援黨友，改去支持葉劉？如果民主派夠團結同爭氣，唔好咁天真，認清楚明年真正嘅對手係中央，咁親中派或會因為葉劉呢個忽然要親中派力撐嘅「外人」而出現一番內鬥，民主派都唔係冇位入。
不過話番轉頭，很多人包括這裏的不少網友，民主派都幾失望(也包括我)，大家只不過還停留喺食雞肋同食雞糞之間選擇，就算民主派發奮圖強，只剩番一年唔夠，係咪就可以洗脫呢個負面形象呢？我諗都幾難。唔通經過選舉洗禮嘅陳太，可以扭轉乾坤？睇嚟亦唔易。不過世事難料，可能葉劉大徹大悟，加入民主派，兩太合壁，即刻攞左三十萬選票呢！
最後，談一個有趣嘅問題。大家估吓，曾特首或其他高官果票係投俾邊個？果日有人同我講，話一定係投俾葉劉啦，我就話唔係，係投俾陳太。點解？第一，那是暗票，投俾陳太都冇人知；第二，應付陳太，比較容易，因為陳太代表嘅係泛民陣營，曾特首一向都要應付泛民，多陳太一個唔多，少佢一個都唔少。但如果葉太當選，咁就大鑊啦，葉太係一個好特別嘅親中派，佢唔係民建聯，唔會只聽上頭做嘢，但佢又係親中派，而葉太係一個舊高官，與曾蔭權有嫌隙，又有何出奇？就算冇，葉太想選特首，自然也要針對曾和他的馬仔做事，得閒篤吓佢哋背脊，咁曾馬房嘅馬就真係冇日安寧。即係話，煲呔無端要應付一個新敵人。
陳太就做唔到呢啲嘢，因為陳太打小報告，中央睬佢都傻。陳太要選特首，中央會肯俾佢過關咩？所以，我估曾果票係投陳太嘅。當然，都係估，呢一票就只有煲呔自己先知了。