見義勇為，多管閒事
葉一知
昨天在某商場，有兩名男子嗌交。一個，是後生肥仔，另一個，年紀稍大，是個阿哥，身旁有個女人，應該是她老婆。我是一名八婆，怎會放過看好戲的機會，立時拿出花生，擔凳仔坐定定睇戲。
睇咗一陣，只見阿哥係咁「x你唔好走」，樣子很惡，聲線很大，即使老婆扯佢走，都唔走。只聽阿哥的主要觀點是：「你要玩野，你話要報警，你報啦，我好驚呀，你恐嚇我。」而肥仔就不時用手機拍阿哥，隻手，很震。
鬧了一陣，都不知道鬧乜，正想離去，這時阿哥又重申：「你恐嚇我，你唔報警我報警。」說完拿出手提電話，報警，好大聲話自己受到恐嚇，好驚。報完警後，肥仔卻想離去，阿哥就拉住去，話「報咗警你唔好走，係你話要報警」(這個觀點在以後重複了n次)。兩人拉拉扯扯，向前行左十來步，一班八婆(當然包括我)又跟着行前。
兩人一個要走，一個死扯住唔俾走，十分纏綿。反正冇乜好看，又報左警，報左警就一定唔會打起上來，因為看形勢，阿哥惡形惡相，會打都係佢出手打，佢報左警就唔會咁蠢打人。
正要離開，突然一個阿伯，頗大隻的，見義勇為，挺身而出指罵：「你唔好走，人地報左警你唔好走。」然後同肥仔對質起來。
阿伯開始向圍攏的群眾發表偉論：冇野唔會俾人捉住架，冇野佢就唔使走啦，梗係有啲野嘅……」
肥仔反問：「有乜野呀？你知有乜野？」
阿伯大聲演說：「冇野你使乜走？一定有啲野嘅。(跟圍觀的人說)唔係偷野就非禮啦。唔係點會捉住佢，佢又點解要走。」
看到這裏，我覺得不能沉默。由於我早兩天看了《葉問2》，學了幾招日字衝搥，膽大起來，預了一戰的決心，就出來同阿伯講：「X你(呢句心裏面講的)，佢哋係果邊鬧交鬧到過嚟，鬧咩我就唔知，但非禮就冇，你唔好屈佢非禮，呢啲好大罪，你喺度話佢強姦，佢隨時俾人喺度打死。既然報咗警，大家等差人處理，大家都唔係專業，無謂喺度估。」這時阿伯開始縮，言辭再沒有那麼強硬，跟我說唔知乜春的廢話。剛巧，差人到來了，我便離去。最正係，差人叫兩名男子去問話，個肥仔醒目，係咁指住阿伯話：「呢個知道乜事，呢個關事架。」阿伯連番否認：「我唔關事，我路過的。」肥仔死都指住佢：「呢個關事架。」於是阿伯被捉去問話。
我在一旁笑到PK。
把這件事寫出來，只因事件很有中國特色。我們常被教導，不要多管閒事，所以我們也很少見義勇為。見義勇為始終是好的，見義勇為不一定是多管閒事，但沒有用腦袋的挺身而出，還要屈人，就是很醜惡的多管閒事。其次，呢個阿伯的言論很有中國特色，就係沒有證據卻愛用誅心之論，再用強烈道德作審判，故一野就用非禮這種最易惹起公憤的罪名。但作為一個專業的花生客，其實唔使睇前段，我都知冇可能係非禮或偷野，因為如果係，捉住人的阿哥就唔會只係好大聲提出好無力的指控：「係你話要報警，依家我報咗警，你唔好走。」反而係不斷話：「你非禮我老婆/你偷我野，你唔好走。」
這個故事告訴大家，一個人想走，另一個人拉住人，唔一定係拉住人果個實啱，想走果個實身有屎。睇戲要睇全套，未睇到結局前，請勿估劇情，要估都不要開聲估，妨礙和影響其他觀眾，尤其當你只有一個爛腦袋。作為花生客，也要有清晰腦袋，不要給像維園阿伯的激動言詞左右判斷，記著，你只是一個八卦想睇熱鬧的八婆，但請專業一點，你只是看戲，而不是參與劇本創作。
在我看來，這多半是兩人因為碰撞之類嘈起上來，十分無謂，只是有人唔順，要報警處理。我沒有看下去，但我離去時想，我可唔可以留低作證，證明肥仔手震震，一度驚過阿哥，而反控阿哥浪費警力呢？哈哈。