民建聯再創新英語，五一六齊投佢
葉一知
近日很忙，但想起五一六投票日，幾忙都要來呼籲下，請大家踴躍投票。
最近我好BUY民建聯，十八聾人愛落區好好聽，加上看到李慧琼以下呢張BANNER，我更加愛上佢地：
例如李議員曾經話，佢唔反對食藍鰭吞拿魚，原因係佢囡囡好鍾意食，所以反對囡囡會嬲喎。呢種一定係「ethic minorities」的演繹。又例如立法會主席曾鈺成，話會辭職去投票支持政改，人地問佢有冇做壞規矩，佢就話佢辭左先投，先至唔係做壞規矩。但人地意思好明顯係：從來冇主席辭職去投票，你做第一個辭職去投票，係咪做壞規矩？但佢就發揮「操守少數」精神，覺得咁樣做主席係非常有操守，仲冇做壞規矩添呀。這種異於常人的操守觀，顯然也是ethic minorities。還有，以前維園阿伯在城市論壇狂鬧民主派議員，又吐口水又爆粗，民建聯成員都好樂意出席，當維園阿哥進攻城市論壇，又冇吐口水又冇爆粗咁同佢地對質，佢地又即刻唔上，呢種雙重道德勇氣，也異於常人理解，又是一種ethic minorities。
民建聯的後生仔女，個個英文咁好，先有搓我個breast搓得好窩心的克勤仔，而家又有創出ethic minorities的慧琼姐，實在為極重視英文的香港爭光。所以話你地班八十後，中英文唔好又多事幹，學下議員哥哥議員姐姐，以佢地為榜樣啦。
我覺得ethic minorities係專用來形容民建聯的，我真希望有人搞過facebook group，要求牛津字典收錄ethic minorities呢個新詞。
由於民建聯表現實在太好，呢個星期日我點可以唔投佢地一票呢。
吓? 咩話，乜今次補選一個民建聯候選人都冇咩？太可惜了，因為ethic minorities的關係，我一生人可能只有這一次支持民建聯，竟然冇得投？咁唯有投番俾民主派啦。
大家都記住去投票呀。