寫生阻街與食蕉文化
葉一知
報載，徐悲鴻末代入室弟子、中國油畫大師龐均走咗去中環扶手電梯為擺花街寫生，點知搞緊西九文娛藝術區嘅香港係唔俾寫人生，幾個惡形惡相嘅「食蕉」(security)出嚟三度驅趕，指龐均阻街，最後仲要報警求助，由警員勸喻離開。
香港做藝術家，就係咁搞笑，做畫家就更慘，去畫人體寫生，又會俾淫審處話你淫褻不雅，走去街上面寫生，又會俾人話你阻街。咁又係嘅，藝術家不單被視為乞食(雖然龐均幅畫話值十二萬)，更被香港人歧視架嘛。要寫生，都揀番啲有藝術氣息嘅地方吖，例如西九地皮，而家仲有祖國嘅火箭俾你寫生添，到時有人趕你，你咪話「點解文娛藝術區唔俾進行藝術活動」。不過你得到嘅答案好可能係：「我哋係搞偽術，唔係搞藝術。」