星期一, 11月 12, 2007

外國勢力開聲係唔同??

<<

葉一知


蝙蝠俠來港拍攝,得到特區政府全力協助,封路、准許直昇機低飛、容許拍攝噪音以及營造不夜城帶來的光害和耗電,簡直要風得風,唔要雨真係口水都唔敢有一滴。當然背後還有強大民意支持——大群湧到中環看熱鬧的市民。

近月,輿論常常罵人「漢奸」,較厚道者,承認中國有很多不足的地方,但不應這樣「求助」於外國人。但我就越來越發覺,外國人要做,肯做,肯開聲,又真係幾無往而不利喎。

 

電影界早已常吐苦水,指在香港拍電影多多限制,政府經常口口聲聲說支持,但比起這次蝙蝠俠的大陣仗,審批之快速,協助之戮力,甚麼口頭支持都推翻了。正如杜琪峰說,外國片政府就百分百支持,港產片百分一都冇,簡直是歧視中國人。

這也難怪,港產片早已是個黃面婆,當然不及鬼妹有新鮮感,情婦又總比老婆迷人,就好像《色,戒》的易先生,不會買鴿子蛋鑽戒給老婆,只買給情婦,世事就是如此叫人酸溜溜。

洋人開聲鬼神驚,也不單見於蝙蝠俠拍攝一事。上星期報道指,香港迪士尼樂園開業兩年,入場人數較預期差,第二年的入場人數更下跌。華特迪士尼急急與政府商討擴建樂園,想不到傾吓傾吓,政府已有意改變不會再向樂園注資的立場,考慮再注資,更不排除以現金注資(報道)。

試想,過去幾年本港旅遊業大旺,人家海洋公園賺到笑,跌人唔死執番身彩嘅昂平360也人潮如鯽,偏偏當初認為最有前途嘅迪士尼就蝕大錢。迪士尼呢單投資已經有如割地賠款,而家撈唔掂,還要攤大手板問政府攞,知唔知醜?但最唔知醜嘅仲係特區政府,竟然想繼續付錢,又繼續沒有話事權,延續不平等條約,有冇咁笨?如果當日香港割讓咗俾英國,英國人後來發現呢度冇油水,越搞越大鑊,跟住走去問清廷政府攞錢搞好香港,你話笑唔笑話?

偏偏就唔係笑話,係事實,點解?因為出聲嘅係洋人囉。嗱,所以唔好立亂鬧人漢奸,因為我哋特區政府已經做咗最好嘅典範,就係美帝開到聲,我哋就會主動除晒衫,享受完洋人施以嘅雲雨,不單分文不收,仲要擺低幾舊。

我大力支持事無大小都搵外國勢力幫手幫口,係有效㗎喎!

文章由MemDB聯播系統轉載, 原文請按此閱讀