MSB天王天后選舉之賄選
葉一知
非官方認可MSB活動： MSB天王天后選舉 ，影大無端端搞啲咁嘅嘢，仲擺咗我上枱，嫌我樹敵唔夠多，叫佢除我名，又唔制，話個個玩得好開心。係，個個口口聲聲都話玩吓，你投票就係玩吓，被投票就係俾人玩。
最衰係勝出呢個選舉，唔知有乜用。係咪做咗天王，呢一年唔使再寫blog，就每日有幾百人嚟朝聖？又或者各方blogger進貢吓啲美女呀、奇珍異獸呀咁俾個我撚吓先？或者影大向我進貢啲名士，等我豢養一年，叫佢食就食，痾就痾，咁都幾過癮。再唔係，呢一年係咪只有我可以定義「Blog是乜x嘢？」、「寫blog寫乜嘢之天王天后最高指示」？甚至乎我係咪擁有疆土劃分權，可以隨便劃分邊度係私海blog，邊到係慾海blog同邊度係死海blog？
乜都冇？咁選嚟做乜？
不過既然搞果個係影大，叫人發文支持，又唔肯除我名，想佢心中嘅神鵰俾人撚個痛快(我唔知點解佢咁耐都叫我神刁大俠，其實佢先至係MSB的「暗黑巨俠」)，而我一向敬重這個blog界鬼才天王，俾吓面，發吓文，接吓tag，支持吓是項活動，都對得住呢位老blog友！
一周年果時我已經講過，刁民公園賣嘅係榴槤，人哋賣嘅係橙，榴槤同橙點比邊個好食啲？只有你鍾意食邊種多啲！而每個人都有不同嘅「天王天后」準則，例如有啲人投票，係睇個樣，我榴槤咁嘅樣，邊個投？
不過唔妥你嘅人，文字獄DNA又會發作：你賣榴槤？榴槤叫果王，其實你都係想稱王。
王，我梗係想做，不過唔做咩MSB天王，我只想做MSB果王，等唔喜歡嘅人避之則吉，到時仲好，唔使見到人哋掩避歧視嘅態度，煩住我享受榴槤飄香。
呢啲天王天后嘅虛名，要睇得化。好衰唔衰真係有人咁俾面投我，搞到我high晒，晚晚瞓唔著，半夜三更都起身睇吓影大update咗個新戰況未，致夜尿閉塞，突然覺得唔可以冇咗呢啲虛名，唔輸得，仲要贏開行，統一全blog界，做特首，統領全宇宙，名垂千古。
為咗贏，我決定要用最後絕招：賄選！嗱，邊個夠薑投我一票嘅，我每票醒1000大元過去。只要你投咗票，通知我，留低電郵，我第二日即刻電郵番張一千元紙過你。
一千元喎？嫌錢腥呀？仲唔立即行動喎！
嘿，影大，你話咗唔俾造馬，我而家賄選，你冇理由仲唔除去我嘅參選資格，唔該快啲做嘢！