邊個夠膽話毛澤東低B？

葉一知

呢排政界真係好戲連場，每個禮拜都有啲精彩嘅sound bites咬下，先一輪有煲呔話文革係極端民主，跟住又有李柱銘忽然漢奸，今個禮拜仲搞鬼，可能適逢萬聖節，連鬼都開聲，澳門永利賭場個老闆史提芬永利(Steve Wynn)是但噏，喺拉斯維加斯一個商務會議上話毛澤東正低B(imbecile)，發動文革，差啲毀滅咗成個國家喎！

痴線，呢啲咁嘅老外，喺度亂噏廿四，干預我哋中國嘅內鬥，即係干預埋中國嘅內政，係漢奸，係走狗。咩話？佢係鬼佬唔會係漢奸？而家漢奸嘅意義唔係已經等同「X街」咁可以用喺任何唔順超嘅人身上咩？唔係邊得香港突然咁多漢奸呀？

 

史提芬呢啲鬼佬，開賭場賺晒我哋自由行同胞啲錢就叻，講到邏輯同中史，真係行埋一邊啦。我就斗膽問史提芬一句，如果毛澤東係低B，咁跟隨佢嘅紅衛兵同一直捧佢為偶象嘅人係咩呀？低C定低D？捧一個低B嘅人做偶象，果啲人應該叫低乜？低Q？低能？定低Q能？咁文革過咗咁多年，又一早被中共否定為錯誤，到今日仲有班人喺維園大談毛澤東嘅偶象事蹟，講到手舞足蹈，跪地膜拜，又或者喺屋企掛幾個毛像，同觀音關帝並列，咁呢啲人咪屬於低能嘅最高級，即第九級低能，低九能(唔該唔好刻意讀錯)？

嗱，史提芬，呢啲低B形容詞係唔可以亂用嘅。你用咗係毛澤東身上，咁佢地嘅fans你用咩形容先？冇理由係同等低B架？唔通叫「低Ber」、「低Best」、「more 低B」或者「the most 低B」？

今次我真係要為老毛平反，痛擊說三道四嘅外國勢力。不如就今個星期日三點，維園集合，遊行過澳門永利，沿途高叫口號「毛澤東唔係低B嘅」。我哋要清清楚楚話俾史提芬知，歷史上造成人類大災難嘅禍首，冇一個係特殊學校出嚟嘅，低B嘅人不知幾善良，點會做出啲咁邪惡嘅事？我哋更要向親中愛國團體申請撥款，資助維園阿伯示威完去永利玩兩手，先叫港親國親不及毛主席親架嘛。 此文章由MemDB的聯播系統轉載