港大陳冠希
葉一知
現有港大陳冠希之稱嘅內地學生，死蠢地將自己與女友嘅交歡片段放入USB手指，點知玩手指玩出禍，玩到唔記得收番埋隻手指，仲以為香港大學生道德高尚，有尊重私隱嘅常識，傻下傻下之際，短片連同個人履歷轉眼間已流傳整個港大(報道)。
至於果個拾而不報嘅學生，仲蠢，竟然叻唔切，在內聯網發放該短片和履歷，迅速俾人拘捕。校長徐立之更表明會嚴懲，可能趕佢出校(報道)。
有冇搞錯呀，放人哋啲性愛短片，揭露呢啲內地大學生嚟香港唔係讀書只係溝女咁虛偽，都有罪？有說藝人係良心事業，咁做大學生唔通係比藝人更冇良心嘅事業？該港大學生高舉正義旗號，制裁呢啲偽人，一向係香港人崇尚嘅英雄，點可以話拉就拉架？何況我哋香港市民，一向認為你拍得出就預咗俾人睇，而家呢個港大學生只係做大家預咗嘅事，使唔使嚴懲呀？