首要活化迪士尼
葉一知
有調查指，2007年港產海洋公園成為全球第十六位、亞洲第五位最旺場嘅主題公園，更錄得破紀錄嘅492萬入場人次，相反，來佬貨迪士尼樂園嘅入場人數比前年減少兩成，排名更由十八跌到廿一。
很明顯，大嶼山要活化嘅唔係假日人山人海嘅大澳，而係迪士尼。港府既為大股東，點可以唔諗吓辦法活化迪士尼？加埋上海又話要起多個一樣嘅美帝樂園，真係冇眼睇。大澳冇問你攞過錢，都活得好哋哋，反而迪士尼億億聲，越搞就越得得哋，仲活乜鬼化大澳吖，唔好唔化啦，活化咗個迪士尼先吧啦。
學特府話齋，要活化，梗係要用新思維。我哋一定要抛開對迪士尼原有嘅印象，重新規劃。嗱，迪士尼本來係兒童嘅樂園，但眾所周知，香港迪士尼係以內地遊客為對象，要活化，就要適應國情，要喺大陸遊客嘅口味入手。