邊個咁蠢要刺殺馬丁
葉一知
十年間，香港真係變晒，六四經重新定義再定義，連「屠殺」兩個字都竟然有人唔識解，竟然要問定義。更估唔到，真係有人會買兇殺一啲無關痛癢嘅政敵。
殺李柱銘，不應是中央的主意。共產黨玩逼害玩批鬥玩政治，經驗老到，從來唔使用槍去對付一個人——除非為數太多，一時間無法組織批鬥隊伍，便唯有用真槍實彈解決了。
刺殺李柱銘，是天底下最大的蠢事。李柱銘未瓜柴，已經被捧為「香港民主之父」，當然這種吹捧有害人之嫌，但馬丁在香港民主路上的貢獻，仍然有目共睹，故他同時被捧為「香港頭號漢奸」，足可見其影響力，心眼明亮的人自會識貨。
近年馬丁退下火線，已有淡然之勢，一正一惡的吹捧也少見報。此時刺殺馬丁，無論刺殺有甚麼動機，以馬丁的背景和往績，任何人也很容易將之與政治掛勾，那豈不是將他捧為中國歷史上壯烈犧牲的民主烈士，甚至成為香港爭取民主的一碌精神支柱，名垂千古？到時馬丁李柱銘真箇變成馬丁路德金了。
如果馬丁真是在拉票期間慘遭刺殺，恐怕選舉結果將大大不同，一個「唔好彩」泛民因為馬丁的壯烈犧牲而取得過半數議席，豈是一眾左派及阿爺樂見的？
所以暗中要刺殺李柱銘的人，一是想害中共，借馬丁之死激化華人仇恨祖國政權的情緒；一是自以為聰明的擦鞋仔，以為解決阿爺心中的一顆大釘，便可升官發財扶搖直上；一是那個人真是傻的。