乳壽司廣告
葉一知
最近板長壽司的兒童餐廣告，成為網絡討論的焦點，Facebook也成立了相關群組。
第一次看到這個廣告，覺得很白痴，賣兒童餐廣告，使唔使出到豪乳鬼妹？最搞鬼係，個細佬的反應好似麻甩佬見到個酥胸半露的鬼婆，肉緊得深呼吸，相腳緊張得猛貼椅腳，身子坐直，好似第一次叫雞不知所措咁。臨尾個鬼妹仲要來個日本式九十度彎腰，豪乳盡露，還以為係西方hardcore加日本AV混合版的開場。不過我為人正直，果時仲以為佢係賣「喂哺母乳，有益健康，西洋奶水，超級健康」的宣傳廣告。
有啲人話呢個廣告教壞細路。傻啦，細路睇完係唔會被人教壞，因為細路(八九歲以下果啲)對女性的胴體還未懂得反應，也未有邪念。正如靚女們肆無忌憚咁抱起啲男性小朋友，你會唔會變態得覺得自己在色誘啲細路？除非你天生變態有孌童癖，不然你也不會覺得有嘢，細路就更加唔會想起啲邪嘢。
呢個廣告的問題，反而係諗廣告和通過呢條橋嘅成人，佢哋個腦究竟裝咗啲乜？點解會覺得用豪乳來sell兒童餐，係work而且恰當？講到底，呢班人只係將自己代入落去過細路到，以為自己見到性感鬼妹會直吞口水，細路仔也會一樣？唔好侮辱咗細路嘅赤子之心好喎。我知道大人們好多都冇咗呢顆心，但你唔能夠剝奪細路嘅天真，將佢哋當成自己一樣咁鬼死鹹濕，將得不到的性幻想借廣告的細路表現出來。呢啲唔係叫廣告創意，叫幼稚兼低俗囉。
不過諗深一層，可能係佢哋聰明先啱。試諗吓，個細路唔會無厘頭走入去自己叫個兒童餐嘛，一定係大人帶埋入去，咁呢個廣告就滿足咗好多自卑的中國小男人啦，佢哋成日都想「征服鬼妹」，一雪八國聯軍之恥，偏偏有能力溝鬼妹嘅中國小男人，又少得可憐(嫖鬼妹始終未能完全洗脫自卑啊)。呢個廣告，正好滿足佢哋潛藏嘅慾望，話唔定自己走落去板長叫個兒童餐，腦際一邊回味鬼妹那對豪乳。這樣看來，這又是一個成功的廣告啊。
其實呢個廣告同幾十年前的綠寶好似。孩子沒有變，變的只是大人。你認為這是創意嗎?